Aafuthi ya iteyela mongerka yaDimbwa

Ku Eliaser Ndeyanale


ONGERKA lyaDimbwa moshitopolwa shaMusati oya li ya yakelwa iikwamambako ya lyo mbyoka hayi longithwa pethimbo lyelongeloKalunga.

Shika osha li sha ningwa oshiwike sha zi ko konima sho ookalyamupombo yatano ya li yiiyakele mongerka mo ka nokukutha mo iinima mbika yongushu yomayovi gahetatu (N$8000).

Opolisi yo moshitopolwa shaMusati oya lombwele onzonkundana ndjika kutya oshiningwanima shika osha li sha ningwa momasiku 12 August nuumvo sho aalumentu ye li ya tano ya li ya longitha oshisaaha nokutetapo ekumba lyo pomweelo gongerka nokuya meni lya yo.

Iikwamambako mbika oyili paife ya monika, oya li ya kwatwa ko opamwe noshipakete shomapunyaapunya shoka sha li wo nasho sha yakwa puundunda wo Etayi no pOnandjamba mpoka aniwa pwa yakwa iinima yongushu yoodola dhaNamibia omayovi omulongo nagatano lwaampoka.

Aafekelwa oya mangwapo kopolisi esiku olyo tuu ndyoka ya li ya yaka iinima yongerka noshowo yoohandimwe. Omadhina gawo ogo: Haiohambo Immanuel gomimvo omilongo mbali nomugoyi, Iishi Kleopas goomvula omilongo mbali nomugoyi, Joseph Simon omunamimvo omilongo mbali nantano noshowo Lazarus Likius Nghidipohamba ngoka ena omimvo omilongo mbali nambali.

Omufekelwa omutitano ka li a mangwa po natango ethimbo oshifo shika sha li tashi yi koshinyanyangidho.

Ndika egongalo etiyali lya ELCIN ngaashingeyi lya yakwa mOwambo, omweedhi gwa zi ko, oombudhi odha li dha iiyakele megumbo lyomusitagongalo gwaShakati noya li ya yakamo  o TV yo Panasonic, o lap top yo Lenovo noshowo ongodhi yopeke yo Samsung. Ayihe mbika oyi na ongushu yoondola omayovi omulongo na limwe (N$11000) lwaampoka.

Sho a li ayiwa naye moonkundathana konzokundana ndjika pethimbo ndyoka, Omusita gwegongalo ndyoka tatekulu Erasmus Nangongo okwa ti kalyamupombo okwa pitile mekende lyondunda yaayenda nokwa kutha mo o TV, o lap top noshowo ongodhi yopeke mbyoka ya li ya tulwa poshipundi shesofa oshiluudhe shoka shili mondunda yaayenda.

Okwati wo omufuthi ka li akwatwa natango. Omusitagongalo okwati okwa li adhimbulula eyako po lyiinima ongula yOsoondaha sho apenduka.

Tatekulu Nangongo, okwati konima wala yoomwedhi mbali dha piti, egongalo olya li lya kanitha eshina lyokopiuta ndyoka lya li lya yakwa moshinyanga kaafuthi.

Okwa hokolola kutya aafuthi mboka yali yiiyakele moshinyangagongalo oya li ya pitile mekende lyokonima lyongerka taye ya mongerka nokuteya omweelo ngoka guli pokati kongerka noshinyanga. Omweelo moka omusitagongalo halongitha uuna teya mongerka Osoondaha kehe. Okwa gwedhapo wo kutya oomivo dhapiti egongalo lyaShakati dhoka li li molukanda lUupindi popepi nosekondele yaIipumbu olya li lya yakelwa omambako ngoka egongalo ha li longitha pethimbo lyelongeloKalunga.

Omusitagongalo okwati ondando yomambako iteyi dhimbulukiwa naanaa oshoka keshi kutya oga li ga landwa noshimaliwa shithike peni, oshoka oga li ga landwa pethimbo ndyoka mpanga a li inaya megongalo ndyoka.

Omusitagongalo okwati eyakepo lyiinima yegongalo otali shunitha egongalo monima oshoka ngashiingeyi egongalo ota li kakonga omakwatho ngaashi okunyanyangidha oombapila pondje yegongalo ngaashi kuundunda wokunyanyangidha mboka hau ithanwa printing shop oshoka omashina oga yakwapo.

Ngashiingeyi omusitagongalo okwa patulula oshipotha sheteyo lyegumbo shonomola 124/07/2019.

MOsoondaha ndjoka iinima ya li ya yakwapo omanga nokuli elongeloKalunga ina li tameka, omusitagongalo okwa lombwele egongalo kutya “inandi lalapo nande nena oshoka oombudhi odhiiyakela megumbo lyegongalo etadhi kuthamo o TV, o lap top yegongalo noshowo ongodhi yopeke yo Samsung.”

Omweedhi ogo tuu ngoka egongalo ndyoka olya li lya yakelwa ongendjo.