Kansela ambonyonapo ohauto ye yiilonga

Ku Eliaser Ndeyanale

KANSELA goshikandjohogololo Omulonga moshitopolwa shaHangwena Erickson Ndawanifa, okwa sitamba oshihauto shepangelo shoka a pewa opo avule oku longa Iilonga ye yuunashipundi woshitopolwa shaHangwena.

Ndawanifa ngoka oye omunashipundi go regional council yaHangwena okwa li aniwa ambotso oshihauto shika moshihauto oshikwawo momasiku 21 Septemba nuumvo.

Ota ku hokololwa kutya oshiponga osha li sha ningilwa mondjila onene ya za kOshikango yuuka kEenhana uusiku wetihamano lyomasiku 21 Septemba.

Mboka ye na uuyelele moshinima shika, oya popi kutya pethimbo lyoshiningwanima, Ndawanifa okwa li ina hala oku landula omalombwele gopolisi ndjoka ya li ye ya poshiponga mpoka.

Nashika osha li sha eta aniwa opo aapolisi ye mu fale koshipangelo nokonima aniwa okwa li a mangwa po nokwa li a mangululwa mOmaandaha gomasiku 23 Septemba konima sho a li aholoka mompangu ya magistrate kOhangwena nokwa li apewa iifutilemo noshimaliwa shoondola omayomvi gane (N$4000).

Sho apulwa kombinga yoshipotha, Ndawanifa okwati ye ka li nande omoshiponga shoshihauto.

Sho a pulwa okwati ngeyi “olye eku lombwele uuyelele mboka? Ngame kanda li moshiponga shoshihauto pamwe mboka taye ku lombwele ngawo oyena uuyelele wa gwana moshinima shoka.”

Nonande tate Ndawanifa okweshi ikala kutya okwa li moshiponga, omunambelewa omukuluntu moshitopolwa shaHangwena ngoka ha ithanwa chief regional officer, Fillipus Shilongo okwati tate Ndawanifa okwa li moshiponga shoshihauto moka mwa li mwa ehamekelwa oshihauto shepangelo.

Tate Ndawanifa oku li wo aniwa apatululilwa oshipotha shokuhinga nuuhasha shonomola yo CR41/09/2019 no kwa tegelelwa natango a ka holoke mompangu ya magistrate gwaHangwena momasiku 28 Oktomba omumvo nguka.

Okwati wo ngashiingeyi tate Ndawanifa okwa pewa po oshihauto shimwe konima sho ambonyonapo oshihauto she shiilonga.

Okwa popi wo kutya oshihauto shoka shambonyonwapo ku kansela keshi kutya oshi li peni oshoka ye ineshimona.

“Oshihauto shoka osha falwa kehala lyontumba shi li megameno. Ashike kandishi kutya oshi li mOshakati, omOshomeya nenge okOvenduka.  Ehangano lyekwashilipaleki olyo lishi kutya oshihauto shoka oshi li peni,” osho omusamane Shilongo a lombwele onzonkundana ndjika mEtiyali lyoshiwike shika.

Okwa gwedha po wo kutya oshihauto shoka shapewa tate Ndawanifa ngashiingeyi oshopakathimbo ashike.

Sho wo apulwa ngele tate Ndawanifa ota futu oshihauto shoka ambonyonapo, omusamane Shilongo okwati opena omilandu dhoka hadhi landulwa uuna oshihauto shepangelo sha mbotswa po.

Ashike pampango ngele omuntu okwa mbonyona po oshihauto shepangelo, oheshifutithwa nenge a kuthwe miilonga pakathimbo nenge a tidhwe mo miilonga.

Omupopiliko gopolisi moshitopolwa shaHangwena Warrant Officer Kaume Itumba okwa ti ina uva kutya tate Ndawanifa okwa li moshiponga shoshihauto.

“Kandina uuyelele moshinima shoka. Inandi shi uva nande,” osho ati.

Onzonkundana ndjika oya li wo ya hokololelwa kutya aakuluntu yamwe yopolisi mOhangwena kaya li yeshi uvitile ombili sho tate Ndawanifa a li amangwapo kaapolisi mboka aashona.

A PHP Error was encountered

Severity: Core Warning

Message: Module 'imagick' already loaded

Filename: Unknown

Line Number: 0

Backtrace: