Onda pangwa oTB, meya gwaShakati ta ti

OMULELI gwondoolopa yaShakati okwa ti iilonga yoku tula omalukanda gaShakati pondondo yopandoolopa opo aantu ya wape oku mona omayakulo gomeya gokopomba, olusheno, nuundjugo tawu pombo otashi ka eta opo omikithi ngaashi oTB dhi shune pevi.

 

Meya Angelus Iiyambo okwa li a popi ndhika mesiku lyoku dhimbuluka omukithi gwoTB uuyuni auhe ndyoka moNamibia lya li lya dhimbulukilwa mOshakati. Sho a popi poshiningwanima mpoka pwa li wo omupeviminista wuundjolowele tate Iiyambo okwa ti naye okwa li wo omuvu gwoTB oomvula omulongo dha yi.

“Mesiku ndika ohatu gandja uuyelele kombinga yuupyakadhi woTB kuundjolowele, onkalathano nokeliko lyoshigwana e tatu gwedha ko wo koonkambadhala dhetu moku kondjitha omukithi nguno. Omukithi nguka ogwa dhipaga aantu oyendji unene yomiilongo yopondondo yiiyemo yi li pevi noyopokati moka Namibia naye a kwatelwa.”

Iiyambo okwa gwedha ko ta ti otema yesiku ndjoka tayi ti “Olyo ethimbo” oya tula omuthindo koonkambadhala tadhi ningwa kaawiliki yopondondo yuuyuni, ondondo yiilongo, yiitopolwa nondondo yomalelo giilando nomikunda moka naye a kwatelwa opo oTB yi kondjithwe momukalo aguhe tagu vulika.

“Osha simana oku kondjitha omukithi nguka hagu ponokele omapunga. Omukithi ogwa tseika hagu ihanene wo iitopolwa yilwe yolutu, ngaashi uuluyi nehukamugongo. Omolwaashono sha simana oku koneka omandhindhiliko ga pamba oTB ngaashi okukolola hoka taku kwata uule wiiwike itatu, uuwehame montulo, okukolola ombinzi, okukala wa vulwa ethimbo alihe, nokupusha uusiku, okukanitha ehalo lyokulya…

“Ngele owa mono wu na omandhindhiliko ngano onawa wu matukile koshihakulilo shi li popepi nangoye wu mone ekonakono e to mono epango meendelelo.

“Nangame wo onda li omuvu  gwoTB,” tate Iiyambo ta ti ngaaka. “Momumvo 2009 onda li omuvu gwoTB. Ihe sho nda dhiginine epango onda aludhwa. Nena ndjika ongame meya. Nena ndjika ondi li nawa notandi vulu nokuli okumatuka tandi thigi po aantu oyendji.”