Omunandholongo a popi shi nasha niikolokosha yopakashikekokantu

OMUNANDHOLONGO omunamimvo 48 ngoka ta longele ondholongo yegeelo lyoomvula 35 molwedhipago okwa li a popi lwotango shi nasha noshiningwanima shokudhipaga omukiintu gwe mo2005, e ta hokolola onkalamwenyo ye opo aantu ye ilongele ko e taya yanda oku ninga iimbuluma yoludhi ndoka.

Omunandholongo nguka Rachimo Haradoeb okwa li ta popi poshigongi sha ningilwe oshiwike sha zi ko kOmbelewa yOmunyekadhi gwOshilongo, mpoka pwa li aantu taya popi kombinga yoonkambadhala dhoku hulitha po iimbuluma yopakashikekokantu.

“Ongame omunandholongo tandi longele egeelo lyoomvula 35 menzulonkalo lyaNamibia, nonda mono ompito opo ndi gandje ehokololo lyandje koshigwana. Omanga ndi li mondholongo onda mono oompito opo ndi gandje etumwalaka lyehokololo lyandje kaakwanezimo yandje.

“Ondi li ngashiingeyi poku mana opolohalama yeilongo lyandje etiyali mondjedhililo oshoka onda tindi oku taamba uukwatya mboka aakundaneki ya ti ondi wu na kutya ongame omudhipagi omukukutu, nonda yi komeho nonkalamwenyo yandje. Onda hala andola opo aakundaneki ya uve ndje ko e taya kundaneke nawa kombinga yokukala kwandje,” Haradoeb ta ti ngaaka.

Okwa gwedha ko ta ti Aanamibia natango oye li kaye uvite ko kutya iimbuluma yomomagumbo ohayi etithwa kushike. “Ondi wete andola tashi kala oshiwanawa ngele aakundaneki ya li haya konakona nokuninga omapekaapeko ya mone kutya ongame lye nezimo moka nda putukila olya tya ngiini, ihe ngashiingeyi ongame omuntu nda lunduluka notandi longele egeelo ndyoka nde li pewa koshigwana.”

Ongomuntu a longa ko oomvula 14 konima yekumba molwoshimbuluma oshinene Haradoeb okwa mono ompito yoku thikitha etumwalaka lye koshigwana okupitila moshikonga sho Be Free Be Safe tashi ningwa kOmbelewa yOmunyekadhi gwOshilongo opo ku adhike ehulitho po miimbuluma tayi ningwa kaantu ye li mekwatathano lyohole.

Sho a popi moshigongi tuu moka Omunyekadhi gwOshilongo meme Monica Geingos okwa ti ota tsikile noku yambidhidha oonkambadhala dhoku kandeka iimbuluma tayi ningilwa aakiintu. Geingos okwa ti ota pula komeho noku konga oompito opo aaningi yiimbuluma osho wo aaningilwa yiimbuluma ya mone oompito dhokupopya e taya kongo omikalo dhoku kondjitha omashongo ge nasha niimbuluma yopakashikekokantu mbyoka ya ninga uupyakadhi uunene moshilongo.

“Aakiintu oshilongo ashihe otaya tsuwa omukumo opo ya lopote iipotha yiimbuluma taye yi ningilwa, ye yi lopote kopolisi oshoka shino otashi kwatha opo iimbuluma yi mone ehulilo,” meme Geingos ta ti ngawo.