Kansela gwaElim a geela aapiyaganeki yomOkadhiyakoshumba

KANSELA gwOshikandjohogololo shaElim tate Gerhard Shiimi okwa ti aantu mboka taya piyagana momukunda Okadhiyakoshumba nayeshi hulithe po meendelelo ngele inaya hala oku katukilwa onkatu ya kindja.

 

“Onda li nda tuma aawiliki kOkadhiyakoshumba ndele okwa kala omapiyagano taga ningwa kokangundu ke li ompinge niilonga yetu. Nandi mu lombwele kutya ngele ehumokomeho olyo mwa hala omukundu gwokwaahe na ehumokomeho ihagu kuthwa po nolugodhi,” Kansela Shiimi ta ti ngaaka.

Shiimi okwa li ta popi poshiithanene shedhimbuluko lyesiku lyemanguluko sha ningilwe posikola yedhina Kampelo Combined momukunda Omuthitugwalwani mOshikandjohogololo shaElim mehuliloshiwike lya zi ko.

“Aakadhiyakoshumba omu na oku kala mwi idhidhimika. Olusheno otalu ya. Pulakeneni kukansela naawiliki mba nda tula po. Mokadhiyakoshumba olusheno otalu ya owala. Inamu tsuwa omaminimini. Itashi ti katumu hole. Metitatu tali ya omo ndi li mOkadhiyakoshumba. Kaleni tamu pulakene kungame.

“Otu na elago nokuli mOkadhiyakoshumba oshoka otu na osikola Ben Shikongo ndjoka tayi ke tu petha olusheno. Ngiika aanangeshefa yamwe ya hala olusheno lu thike mbala oyo taye mu tsu omaminimini notaye mu lombwele iipolopolo. Inaya tseya kutya olusheno poTsinotsino olwa za kOshikandjohogololo shaGongo. 

“Inamu kumwa ngele mwa uva nde ya ko e tandi kwata po ye li omilongo ndatu taya falwa kOkahao. Opolisi opo yi li. Otayi ku kwata ngele oto piyagana. Opwa li ongungu yoTaliban mpo, paife oyi li peni? Opolisi otayi ku shuna ko kondholongo. Onda hala mu ikwate nawa, e tamu pulakene kukansela sho tandi ti,” Kansela Shiimi ta ti ngaaka omanga inaa tseitha omupopi a simana gwesiku omupeviminista gwiimaliwa.

Omupeviminista gwIimaliwa tate Natangwe Iithete okwa ti Aakadhiyakoshumba inaya tila oshoka epangelo oli ya wete noitali ya thigi konima. “Kamu wete omafufu gandje noshipa shandje? Ngame ogumwe gweni. Tse Aakwankala. Ngele omo ndi li mepangelo nane omo mu li mepangelo, inamu patelwa pondje,” Iithete ta ti ngaaka.

Omupeviminista okwa gwedha ko ta ti epangelo olya tula po oshimaliwa oshindji shi thike poopelesenda 49 shoka tashi ka longithwa momayakulo goshigwana. “Otwa tseya onkalo yoshikukuta, epangelo lyetu olya thikama opo li kondjithe onkalo yoluhepo moshigwana shetu. Opo nduno openzela yaakulupe oya gwedhelwa ishewe e tayi thiki ngashiingeyi peyuvi nomathele gatatu.”

Mwene gwomukunda Omuthitugwalwani tatekulu Gabriel Amunyela okwa taamba ko aayenda e ta pandula epangelo shoka lya longo moomvula dhemanguluko. “Otatu pandula wo moshitopolwa shetu otwa pewa omalusheno, nomahumokomeho galwe ngaashi oongulu dhosikola. Otushi shi kutya oshilongo oshi na ondjala, ndele inatu mona omuntu a sa molwa ondjala oshoka epangelo ohali gandja omakwatho gokashona hoka ke li po.”

Omusita gwokEtameko Reverend Martha Shihomeka okwa pandula epangelo sho lya longa oshindji e ta pandula wo epangelo sho lya londeke ondando yomapunyapunya nomakaya. “Ndele otatu indile andola ondando yiikulya nayi kululwe. Aantu ngele oye na ondjala itaya mono uutoye wemanguluko. Yo aantu ngele oye na ondjala komambo ihaye ya ko,” Omusita Shihomeka ta ti ngaaka.