A holoka mompangu molwedhipago pongeleka

OMULUMENTU omunamimvo 58 ngoka a li a dhipaga mukwawo sho e mu tete nekatana nokumu tsa nombele pongeleka pEfidi okwa holoka mompangu yamangestalata mEenhana mOmaandaha noshipotha osha undulilwa komasiku 31 gomwedhi omutitano.

 

Omusamane Simon Kaudinge gwomomukunda Okauva mOshikandjohogololo shaNdobe okwa li a kutha ekatana nombele molwa ongeyo sho iikombo yamushiinda she ya li ya yi mepya lye. Kaudinge okwa landulile mukwawo kongeleka hoka a li te ilongo omaimbilo nongundulwiimbo yongeleka. Kaudinge okwa adha mushiinda she omunamimvo 42 e li mongundu yayakwawo taya imbi omaimbilo pongeleka mpoka e temu ponokele nekatana lyomomutse.

Aantu oya pondola oku kwata omusamane Kaudinge e taye mu kutha ekatana. Ihe Kaudinge okwa kutha ombele ndjoka a li a homata e ta tsu mushiinda she. Aantu oya li ya kwatha naku monithwa oshiponga opo a ka mone omakwatho guunamiti ihe oometa oonshona owala molugumbo lwongeleka moka omusamane okwa ongotele e ta hulithile mpoka.

Oshiningwanima osha li sha ningwa momasiku 28 Maalitsa nosha li sha halutha aantu oyendji momudhingoloko gwaNdobe. Omusamane Kaudinge okwa li a kwatwa po nokwa holokele mompangu mEenhana noshipotha e tashi tsilikwa komasiku 31 gaMei ye ta kala mondholongo omanga a tegelela epangulo.

Moshiningwanima oshikwawo oshikumithi omukiintu omunamimvo 35 okwa hulithile moshipangelo momasiku 31 gaMaalitsa konima sho a kala uule woshiwike moshipangelo e li monkalo ombwinayi konima sho a dhengwa kuyinamweno molwashoka okwa li a lya onyama mombiga.

Oshiningwanima osha li sha ningilwa momukunda Onamahoka mOshikandjohogololo shaMulonga. Okwa hokololwa kutya omukiintu gwoomvula 68 okwa li a kutha oshiti shoshikombe e ta yi puushiinda mpoka a landula mukwawo ta ti okwa lya mo onyama ye yondjuhwa mombiga. Sho e mu adha okwemu dhenge noshiti shoshikombe momupolo osho wo moombati.

Naku dhengwa ngoka taku tiwa okwa hokanwa komumati a valwa komusamane gwanakudhenga okwa ka falwa koshipangelo e li monkalo ombwinayi hoka a ka hulithila konima yoshiwike.

Omupopiliko gwopolisi yOshitopolwa shaHangwena Warrenda Abner Kaume Itumba okwa kunkilile oshigwana kutya inashi ikuthila oveta kuyo yene. “Otwa shitwa inatu faathana shili, ihe oshilongo oshi na ooveta, noshi na omilandu ndhoka dhi na oku landulwa ngele owa yonenwa kumukweni,” Warrenda Itumba ta ti.

Itumba okwa ti oku ikuthila oveta e to dhenge omuntu otashi ku etele uupyakadhi uunene u vule mboka wa li owo weku geyitha. Ano aantu naye idhidhimikile oku konga ekwatho kopolisi yo yi ungaunge niipotha moshigwana.