Polupale latate Victor

OKUHA teka omukumo oko efina loku pondola sha. Keshe shimwe to lalakanene, ngeenge otashi ku etele ouwa ile efimano ile efindano lonhumba ile longadi, sho oshi li mouwa woshiwana hano oto shi hange tuu ngeenge ino teka omukumo. Ngeenge owa hala oulongelwe wonhumba ile owa hala ku kala omunangeshefa wondodo yopombada ile owa hala oku ninga omunashilonga shafimanekwa moshiwana ile 
owa hala oku ninga eshi ile shinya – keshe tuu shimwe osho wa hala komwenyo woye otashi shiiva ngeenge ito teka omukumo. Oikando ihapu ou na oku dopa, oikando imwe oto sholola, yo ikando imwe oto loloka. 
Ashike ngeenge eshi to lalakanene oweshi hala nomutima woye aushe ove ou na oku hanga tuu efindano. Ovanhu vahapu ihava findana moilalakanenwa yavo shaashi ohava teka diva omukumo. 
Omunhu ota xulile ondjilakati eshi a mona kutya oko a uka itaku fikiwa mongula. Ovanhu ovafiya po oipewa yavo nomaifano avo shaashi ova mona kutya itai hange diva efindano. Ovanhu otava lotokele eshi tashi yandje diva oshimaliwa nonande hasho oshipewa shaye. Ovanyasha otava lalakanene oshimaliwa ponhele yoku lalakanena oipewa yavo. Osho oshinima sha fimana omunyasha a lalakanene oshipewa shaye shaashi oshipewa shomunhu osho oshinima shemu etifa kombada yedu. Ngeenge ou wete lela kutya momwenyo woye owa hala ashike ngeno oku ninga omufita, hano oufita oo weku etifa kombada 
yedu. Ngeenge omwenyo woye owa hala oku kala omuteleki weendya, eshi osho oshipewa noshilonga sheku etifa mounyuni. Ou a hala oku shinga eedila ile a hala oku kala omunafaalama, ile omushikingalo, omutoti woitevo, omuhungimwenyo ile omukwaita, omunangeshefa, omunongononi, noshotuu keshe shimwe, ino teka nande omukumo shaashi ngeenge owa pula komesho ou na ashike oku hanga efikilo mwaashi to lalakanene. Ino shikula apa pe na oshimaliwa. Shikula eshi sheku ufanifa. Ovanhu otu va na moshilongo shetu vehe shii eshi sheva ufanifa. Ngeenge owa ende to pula ovanhu to ti: “Eifano loye oli li pi?” ovanhu vahapu itava shiiva omaifano avo. Shaashi ovanhu ove li momaifano a puka. Ovanhu ava ve na oshipewa shoukwaita ile oupolifi ovo tava longo moipangelo, ofimbo ava va ufanenwa ngeno oku honga ounona vokinda ovo tava longo oilonga yokushinga omambakumbakuile oku venda eengobe meefaalama. Ngeenge owa ufanenwa oku longa mofitola, omolwashike nee hano uhe na onghedi youkastoma sevesa ndee oho kala wa ngunya ove oto yakula ovanhu? Ngeenge ove owa ufanenwa oshilonga  shomombelewa oshike nee hano ovanhu vaha di po pombelewa yoye va handuka noinava hala oku alukila po nande efiku limwe? Ngeenge owa ufanenwa oshilonga shoupangi, oshike nee ho kala mokakilinika u li mo to longo nefimbo loye ove to ngwadjaula ovanaudu? Eshi otashi ti ovanhu ove li moilonga ihe fi yavo. Ove li mo ashike molwaashi va hala okupeya ndee oilonga yoludi olo hayo va ufanenwa. Ngeenge oove umwe womwaava ve li ngaha onawa u fiye po oilonga ndee to ka konga oilonga ei wa ufanenwa. Nande itai futu nawa shamha ashike to pula komesho shaashi oyo taiku pe ehafo.