Omugundjuka ta kongo ehogololo lyuukansela waNdangwa

By Victor Angula 

OMUKIINTU omugundjuka okwa tokola oku ka kutha ombinga momahogololo guukansela woshikandjohogololo shaNdangwa yOndoolopa taga ka ningwa momasiku 15 gaJuni nuumvo. 
Angelina Ndinouange Immanuel okwa lombwele oshikundaneki shika kutya otaka kutha ombinga momahogololo onga okandindate ye ithikamena kuyo yene yaa na eyambidhidho lyongundu yopolitika sho taku ka hogololwa ngoka ta pingene po tate Elia Irimari ngoka a li a hogololwa kOmupresidente Geingob oye a kale Gavena gwOshitopolwa shaShana omwedhi gwa zi ko. 
Irimari oye a li Kansela gwOshikandjohogololo shaNdangwa-yOndoolopa okuza mo2015. 
Immanuel okwa ti ekuthombinga lye onga okandindate ye ithikamena po otashi ka kala oshinima shopandjokonona. “Shika otashi ulike kutya omathimbo gamwe oku lundulula ondjokonona otashi pula omukumo neinekelo. Ehogololo ndino kali shi owala lyokusindana nonando otatu pumbwa okusindana opo tu shiwe oku tula omadhiladhilo getu miilonga. Shika osho etumo lyiilonga yepipi ndika, oku opaleka omapuko, okulundulula ehokololo noku gandja omukumo kwaamboka ya teka omukumo. Shika otatu shi ningi nale nokuli manga omahogololo inaaga ningwa,” Immanuel ta ti ngawo. Immanuel okwa ti ishewe ita ka mbandamekwa nando pethimbo lyiikonga yomahogololo oshoka osho uuthemba we ongomukwashigwana oku thikama a hogololelwe iilonga yewiliko lyoshigwana. “Onda pendapalekwa komalunduluko ngoka nda hala okuga eta moshikandjohogololo. Oshikandjohogololo oshi li konima nayi mehumokomeho. Onda tsuwa wo omukumo molwashoka oopelesenda 60 dhaantu yoshikandjohogololo shetu oyo aagundjuka, noya pumbwa okuwilikwa komuntu omugundjuka i itula mo miilonga yuuleli.”Omunamimvo 27 nguka a valelwa e ta putukile momukunda Olunkono ngoka gwa ningi po ngashingeyi Omwandi gwaKamanya mOndangwa ota ti ethimbo olya thika opo aantu ya hogolole elunduluko. “Oomvula 29 dhemanguluko odhindji noku hogolola owala onakuziwa. Onda hala oku wilika ndi li komeho.”Immanuel oye omulongi paithano, nota ti ngele okwa hogololwa a ninge kansela ota ka tula omuthindo kelongo oshoka olyo tali eta elunduluko moshigwana. “Ondangwa oyo ondoolopa onkulunkulu mOnooli, ihe sigo onena kayi na oshiputudhilo shelongo lyopombanda. Aagundjuka yetu ohaya yi kiikandjohogololo yilwe oku ki ilonga. Shika ohashi tula aavali muudhigu woshimaliwa.” 
Ewiliko lye otali ka kala wo lya kwata miiti oku kondjela uuwanawa waakiintu osho wo aagundjuka. “Shika otashi ka kwatela mo oku gandja omakwatho goshimaliwa shoku ilonga kaailongi mboka ya za momagumbo gahepa, noku gandja iimaliwa yokutamekitha oongeshefa. Ethimbo lyoku lombwelwa koominista kutya aagundjuka naya tote po oongeshefa nando kaye na oshimaliwa olye ya pehulilo.” 
Omupopiliko gwEndiki Elongekidhi lyOmahogololo moNamibia Viktoria Hango okwa ti aantu mboka ya hala oku kutha ombinga momahogololo onga ookandindate dhi ithikamena po osho wo mboka taya thikamene po oongundu dhopolitika otaya pulwa ya gandje omadhina gawo okuza momasiku 19 Apilili. 
“Omasiku gane gaMei ogo esiku lyahugunina lyokugandja omadhina gaamboka taya ithikamene po kuyo yene, ihe mboka taya thikamene po oongundu dhopolitika oye na okushi ninga manga esiku 6 gaMei 2019 inaaga pita,” Hango ta ti.