By Gabriel Iipinge
Onkalo yaashoka tashi ningwa moshitopolwa shaMusati otayi kumitha aakalimo oyendji , unene tuu mboka yeli momikunda ngaashi Onandjila B noshowo Olyasiiti. Aanegumbo oyeli taya lumbu nuumbanda sho miitopolwa yawo mwa holokele oondjamba , dhoka tadhi hanagula omaliko noku tula oomwenyo dhawo moshiponga.
Aakalimo oya lopota kutya iinamwenyo oya kala nokwiinyenga momikunda, tadhi hanagula po omagumbo, oodhalate noshowo okuyona po iikunomwa yawo nokutula wo oomwenyo dhawo muumbanda. Otaku hokololwa oondjamba dha ningile egumbo limwe mOlyasiiti omuyonena sho dhayi megumbo lyowene. Oshiningwanima osha eta omayipulo nuumbanda maakalimo oyendji, noyeli taya pula ekuthombinga lyomeendelelo. Uuministeli womidhingoloko, omiti nomatalelopo owa koleke onkalo ndjika nowuli tawu shi takamitha.
Vilho Hangula, ngoka eli omupopiliko gwuuministeli okwa popi kutya aanambelewa oye li ya tumwa komahala ngoka ga ningwa iihakanwa opo yaka tale nokukwathela aakalimo ya kale ya gamenwa. Hangula okwa yelitha kutya omainyengo ogendji goondjamba oga indjipala unene tuu pethimbo lyoondima, sho iinamwenyo tayi ende iinano iile molukongo lwiikulya ngaashi omanuwa.
Hangula okwa popi tati, ‘Aanambelelwa oyeli pevi noya tseyithila uuministeli oshowo ombelewa yandje kwaashoka tashi inyenge komahala ngoka. Otuli tatu tala twa mana mo onkalo nokulonga kekuthombinga opo tu yande omayipumomumwe pokati kaantu niinamwenyo.’
Hangula okwa gwedha po ishewe tati omilandu dhokathimbo dhoka dha etwa po odha kwatelamo oonkambadhala dhokuhinga mo oondjamba momahala ngoka ga ningwa iihakanwa . Pampito dhimwe, aanambelewa oya oya pula uuthemba opo iinamwenyo mbyoka ya nika oshiponga yi kuthwe mo moshigwana. Uuministeli owuli wa tala elongitho lyomadhadhaga meyambidhidho lyoku tembudha oondjamba momahala ngoka muna aantu. Hangula okwa dhidhilike wo omathaneko ga kola notaga kalele ngaashi, omalongo gaakalimo nkene yena okuyanda nenge okukaleka oondjamba kokule opo ku yandwe eyipumomumwe pokati kaantu niinamwenyo , naakwashigwana ya kale megameno ewanawa.
Okwati gwedha po wo tati, ‘Uuministeli inawu nyengwa nowuli wa tambula ko omakemo goshigwana oshowo otawu kutha onkatu onene mokuyambidhidha omdhingoloko dha ningwa iihakanwa kiinamwenyo. Omalelo otaga tsikile noku tala onkalo sho enenedhiladhilo lywao okugamena aantu niinamwenyo.
