By Gabriel Iipinge
Omupresidente gwoshilongo sha Namibia, Netumbo Nandi-Ndaitwah okwa pula aaNamibia opo kaaya pitike uulingilingi, uukwamuhoko nomikalo dhimwe omiwinayi moshigwana dhoka tadhi shunitha ehumokomeho lyoshilongo pevi oshowo uuthikepamwe moshilongo.
Nandi-Ndaitwah okwa thamuna pethimbo lyedhimbuluko etimilongo ne na hetatu (48) lyesiku lyoCassinga, ongulohi yomandaha mOutapi, kutya eyokomeho lyoshilongo oya ikolelela kuuthikepamwe, uushili nelongelokumwe maantu yomoshilongo nomikalo adhihe omiwinayi nadhi ekelwehi.
Omupresidente okwa popi tati, “aaNamibia ooyakwetu, uuna tatu keshi enditha nawa, omikalo omiwinayi ngaashi okatongotongo, nuukwamuhoko itawu ka pitikwa. Otwa hala okuya komeho onga oshilongo opo kehe gumwe a tyapule iiyimati yoshilongo.”
Nandi-Ndaitwah okwa pula aakwashigwana ayehe opo ya kale ompinge naayihe iiwinayi opo ku kwashilipalekwe uuwanawa womapipi gopethimbo lyopaife nomonakuyiwa.
Okwa gwedha po wo tati, “Sho tatu dhimbulukwa nokutyapula esiku ndika lyoCassinga, moka aamwameme oyendji ya kanithila oomwenyo dhawo, otandi pula aaNamibia atuheni opo tu lwitheni ayihe mbyoka tayi yi eyokomeho moshilongo opo aantu yetu yam one omauwanawa moonzo paife nomonakuyiwa.”
Omupresidente okwa yelitha wo eyokomeho lyepangelo meyambulepo lyomatungo, unene tuu momakwatathano gwoopate. Okwa ulike mo eyambulepo lyoondjila sho omalweendo ga indjipala , nokugandja oshiholelwa shilwendo lwe okuya kOutapi, ndoka lwa pula ethimbo ehupi inaashi fa nale, sho olweendo talu kwata owala oominute oonshona tadhi tengenekelwa poominute omilongo ndatu (30). Okwati otashi ulike ethano nomalalakano omawanawa geyambulepo lyoshilongo.
Edhimbuluko lyokomumvo lyesiku ndika lyoCassinga olya talika ko onga oshidhimbulukithi shondjokonona yaNamibia neyiyambo lya ningwa pethimbo lyekondjelomanguluko. Otashi gandja ompiyo metalululo, edhimbulukitho kaaNamibia ya tale mpoka ya za nokutsa aaNamibia omukumo opo ya longele kumwe mokusinda omashongo gongashingeyi nokutunga onakuyiwa ya kola.
