By Gabriel Iipinge
Oshipotha sha tulilwa mo epangelo naapolisi yomodholongo komunadholongo Nikanor Tunyanyukweni Iipinge , shi nasha nomatamaneko gedhengo nemonitho lyiihuna modholongo yokOluno, osha uvika mompangu yaShakati omanga inashi undulilwa komeho.
Mokati kaamboka ya tothwa onga aafekelwa ongaashi minista gwomatembu, egameno niipambele moshilongo Albert Kawana, Commissioner General gwodholongo yomOluno Raphael Hamunyela, omukuluntu omukwatheli Veiko Armas naapolisi yatatu yomodholongo ndjoka, taku fekelwa ye na mosha medhengo nemonitho lyiihuna.
Omukalelipo gwopaveta gwa Iipinge , John Kandara okwa tseyithile ompangu kutya okwa mono omalandulathano a kalelepo omunadholongo nokwa pula ethimbo lya gwedhwa po opo a popye nomuyakulwa gwe noshowo a longekidhe omikanda dhompangu.
Omukalelipo gwopaveta Wilhelm Amukoto okwa holoka onga omukalelipo gwaafekelwa, omanga omupanguli Tomamasi okwa undulile oshipotha komasiku 27 Meyi 2026 komutumba gwetokolo.
Iipinge ota pula oshimaliwa shongushu yoondola dha Namibia omayovi omathele gane nomilongo hetatu ( N$480 000) keyonagulo , ta popi kutya okwa dhengwa kaapolisi modholongo yomOluno momasiku 9 Febuluali 2017.
Omishangwa dhompangu otadhi popi kutya Iipinge ota popi kutya okwa li a tulwa miiketanga , ta dhengwa noongonyo moshipala , ta thangwa mepunda nokudhengwa olutu aluhe pethimbo lyoshiningwanima .
Iipinge okwa popi wo kutya okwa mona iihuna sho a li tazi ombinzi momakutsi , uuwehame itawu polo mbala, itaa uvu ko nawa, nuuwehame wopamadhiladhilo onga oshizemo shedhengo .
Oshipotha mompangu osha popi kutya omatamaneko guufuthi ga kwatathana nedhengo nemonitho lyiihuna kolutu oga patululwa melongelokumwe noshiningwanima nokutya aanambelewa taya tamanekelwa moshipotha oya monika ondjo mompangu ya Magistrate mOndangwa.
