By Gabriel Iipinge
Elelo lyondoolopa yaNgwediva olyeya mompangu tali kongo elandulathano lyokuteya po etungo lyaali paveta lya tungwa pehala Erf5802, Extension 13 mOngwediva.
Omishangwa dhompangu ota ulike kutya elelo olya popi kutya mwene gwomaliko, Ndapunikwa Uukule naangoka ta longitha ehala pafuto Kapakaye Juso oya tungu po etungo limwe inaaya pewa ombapila yekwashilipaleko lyaza kelelo noshowo yethaneko, taku fekelwa yeshi ningi meyonagulo lyoveta yelelo lyopashitopolwa yo 1992.
Elelo olya popi kutya etungo lyaali paveta olya monika mo momasiku 13 Januali 2025 pethimbo lyolweendo talelopo lwa ningwa koshikondo shomathaneko nomayambulepo gokuushayi.
Oombapila dhompangu odha yelitha kutya omadhidhiliko gontumba ogali ga gandjwa kaafekelwa tageya lombwele ya ethe iilonga yokutunga noya hanagulepo etungo. Nomando ongaano, elelo olya popi kutya omishangwa inadhi landulwa.
Omishangwa otadhi ulike kutya aafekelwa oya tsikile niilonga yawo yokutunga , mwa kwatelwa etulemo lyomakende ga taalela omaliko gopuusshiinda, ga tongololwa onga 5803.
Elelo olya yelitha kutya kakele komalandulathano ga endululwa nomakumagidho, aafekelwa oya ndopa noya tindi okukuthapo omatungo gaali paveta, taya thigi elelo lyopashitopolwa lyaana nkene, ihe li pule ekwatho koveta.
Elelo lyondoolopa yaNgwediva otali pula ompangu yi tseyithile aafekelwa ya hanagulepo etungo muule womasiku gatano. Elelo olya pula wo elandulathano lyokupitika aapeha-polisi yomelelo moshitopolwa sha Shana, taya kwathelwa kopolisi yaNamibia ngele otashi pumbiwa, okukwatela komeho ehanagulepo ndyoka aafekelwa ya ndopa mulyo.
Elelo lyopashitopolwa olya pula wo ofuto paveta nuuwanawa walwe ompangu tayi ka landula mondjila.
