By Gabriel Iipinge
Ehangano lyomomeya lyAngola lyoPromaritima Offshore LDA, olya ti olya ilongekidha okweetamo uunongo walyo opo liyambidhidhe omalalakano goshikondo shomahooli noshomoko moNamibia.
Ehangano olya thaneka okudhana onkandangala onenemiikondo yoonzo dhokulonga iikwankondo moshilongo.
Omukuluntu gwehangano moshilongo, Jorge Carvalho okwa popi nokuyelitha moonkundathana no Confidente nkene ehangano lya thaneka okugwedhela iilonga yalyo moNamibia, okupitila momahooli noshimoko mbyoka ya monika moshilongo noya tula oshilongo mokaalita kuuyuni.
Carvalho okwa yelitha tati ehangano lyawo, ndyoka lya kala noku longa mo Angola uule wethimbo lyomimvo omulongo, oli wete Namibia onga oshilongelikumwe moshikondo shiikwankondo moshitopolwa, shi na elongelokumwe neyambulepo lyuunongo.
Carvalho okwa ti, “Otatu kambadhala okugwedhela iilonga yetu moNamibia onga aanongononi momahangano gomahooli noshimoko notatu eta mo uunongo nontseyo yetu opo tu tunge po Namibia pamwe.”
Okwa koneke kutya ehangano (Promaritima) otali kutha ombinga momahangano omanene moNamibia, mwa kwatelwa TotalEnergies no Azule Energy, onga ombinga yasho moku eta po iilonga yalyo miikondo yomangeshefelo moshigwana.
Carvalho okwa gwedha po tati, “Onda inkela kutya Namibia ota koko meendelelo sho tatu longele kumwe na TotalEnergies oshowo Azule Energy notu na ompito yokukoka meendelelo.
Omanga oonkundathana pambelewa tadhi tsikilie nomahangano moNamibia opo ga longele kumwe nehangano ndika lyoParomaritima inadhi adha etsokumwe, Carvalho okwa yelitha kutya oonkundathana dhawo nehangano lyo National Petroleum Corporation lyaNamibia odhili tadhi tsikile.
Carvalho okwa gandja etumwalaka lya kola kaaNamibia unene tuu aagundjuka, teya londodha opo ya ilongekidhile eyambulepo lyomahangano lyomeendelelo. Okwa thamuna wo kutya ehangano otali ka lingela kumwe noompango dhepangelo yokugandja ekwatelemo lyoongeshefa dha Namibia noompito dhiilonga moshikumungu shomahooli noshomoko.
Carvalho okwa dhenge omuthindo kutya omilandu dhopamudhingoloko adhike itadhi ka gandja noku kwashilipaleka oompito dhiilonga, okununga aantu poohandimwe ya ilongekidhila oshinima shika.
Okwa popi ishewe tati Namibia okwa thikama kohulo yelunduluko, ashike uuwanawa itawu ikolele ashike kongushu yaashoka tashi gandjwa, ihe otawu ikolele wo keilongekidho, uunongo noshowo ethigathano lyaantu yomoshilongo.
