By Gabriel Iipinge
OmuPrime Minista Tjitunga Elijah Ngurare okwa kutha etokolo opo a popye mo omashongo ngoka ga taalela osikola yoPendukeni Iivula Iithana Secondary School moshikandjohogololo shaEtayi, moshitopolwa shaMusati, sha landula etaalelepo lyombaadhilila lye.
Ngurare okwa yelitha kutya oye okwa yamukula meukililo keithano lyaza kosikola opo a tale omaupyakadhi nomashongo taga adha aanasikola noshowo ombelewa.
Ngurare okwa tongolola oshindji pethimbo a talele po oshikandjohogololo sha Etayi. Okwa mono uupyakadhi owundji kombinga yomuhandjo gosikola, ngoka guli inaagu pwa okutunga, noguli inagu longithwa uule woomweedhi 12.
Etalelepo olyeya konima sho omakemo ga ningwa kelelo lyosikola sha talika konkalo yomatungo omape taga yambulwa po, noshikumungu shepangelo shoku tunga omihandjo tashi tengenekelwa poomiliona omilongo ne na ne (N$ 44 000 000).
Ngurare okwa tokola opo a pekapeke onkalo paumwene opo a mone mo omashongo ngoka ga taalela osikola. Onkalo ndjika oya eta uupyakadhi unene kombinga yelelo lyosikola negameno lyomaliko gepangelo.
OmuPrime Minista okwa hokolola shoka a mono shili onga tashi shololitha no itaashi tambulwako, sho iimaliwa oyindji ya gandjwa no inayi longithwa shomupondo naanasikola oyeli ya taalela omaupyakadhi gomahala gokuza mosikola.
Okwa kunkilile wo opo omahanganotungi gepangelo ga kale po omalalakano gawo noku yambula po onkalo yelongo, unene tuu kuushayi hoka oonzo tadhi nyangwanyangwa.
Ngurare okwa popi tati, “Otwa yilw kosikokola (Pendukeni Iivula Ithana SS) ihe shoka twa adha ko kashishi oshinima oshiwanawa pakutala. Epangelo olya gandja oomiliona 44 koshikondo shomuhandjo opo gu tungululwe nokuyambulwa po oshowo iikondo yilwe, ashike iimaliwa inayi longithwa sha. Iilonga yimwe iya dhanenwa owala omanga aanasikola taya tsikile okukala yaa na omahala momihandjo noongulu dhosikola.”
Minista okwa pula opo ku kuthwe etokolo nomilandu dhomondjila, tadhi gandja omasiku gokumanitha iilonga mule womweedhi gumwe komatungihangano opo ku kwashilipalekwe kutya ayihe oya longwa nawa noyili pomahala.
Okwa popi ishewe kombinga yomayambidhidho pashimaliwa ga ningwa kaavali yaanona haya sikola poPendukeni, mboka ya kala nokufuta N$ 250 kehe gumwe moku yambidhidha eyambulepo lyosikola.
Aakuthimbinga moshikondo shelongo moshitopolwa shaMusati oya tambulako omayele ga Ngurare, noyeli ya popi ompumbwe yomatonatelo, omahangano ngoka haga longo iilonga meendelelo opo ga pewe iilonga mbyoka nomathaneko gopashimaliwa opo ku yandwe iipotha ya faathana monakuyiwa.
