By Gabriel Iipinge
Ompangu yopombanda mOshakati oya kutha mo oontamanana moshipotha shomuthigululwakanda sha kwatelamo nakusa Leonard Tangeni Pendapala Nakawa konima aapambele mboka ya eta oshipotha kompangu ya tokola yeshi kuthemo.
Ompangu oya gandja elandulathano momasiku 19 Meyi 2026 tagu kwashilipaleke kutya oshipotha osha zamo nokashi mo momusholondondo gwiipotha mompangu. Ompangu oya futitha aapambele mboka ya tulamo oshipotha . Oshipotha sha lalakanena oontamanana otashi tamanekelwa sha kwashilipalekwa ku nakusa Nakawa momumvo 2018.
Aapambele oyali ya hala ompangu yi koleke omushangwa onga egano nekwashilipaleko lya Nakawa lya hugunina konima sho sha tindwa komukuluntu mompangu yopombanda sho taku tamanekwa inaaya iyutha komilandu dhomuthigululwakanda.
Nakawa ngoka a shiwika nawa nedhina “ Mr Easy Life”, okwa hulitha momasiku 5 Juli 2023 megumbo lye lili momukunda Ondando popepi nOniipa moshitopolwa shShikoto.
Omadhimbuluko konima yeso lye ogemu hokolola onga oshilyo shomomudhingoloko sha simanekwa ngoka a za mezimo lya kutha ombinga mekondjelo manguluko lyoshilongo shika (Namibia). Aakuluntu ye otaku lopotwa ya kwathela aakwiita yetanga lyoSWAPO nomalukalwa, iiyenditho, uuyelele nomainyengo gaakwiita yaakolonyeki pethimbo lwolugodhi lwekondjelomaguluko.
Oshipotha shompangu osha eta puuyelele eitopolo maapambele mezimo ngele oya ulike omalakano ga Nakawa ga hugunina.
Mokati komikundu dha popiwa, omwali wo eityo lyoshitya “etopoko” lya pamba kondjokana yawo na Saara Henny Shipanga , neyooloko momishangwa dhe momukunda Ondando nOvenduka momuthigululwakanda gwe.
Aapambele yamwe oya pula ngele omuthigululwakanda ogwa adha omalalakano noya keme kombinga yekengelelo.
Omupanguli Tommasi okwa koleke ekuthemo lyoshipotha konima yetalo lyomishangwa dha ningwa komeho gompangu.
Nonando oshipotha osha hula, uuyelele owundji inawu yela kombinga nkene omaliko ga Nakawa gen a okulongiwa nago okuuka komeho.
